الضحى ماشية على رصيف قصر القبة.. في شيء مختلف مش عارفة إيه هو.. خطوتي واسعة يمكن.. بأة لي كتير ما مشيتش من هنا بخطوة فرحانة.. شاف الرصيف ده كتير مني اليومين إلي فاتوا.. مرة مخنوقة ومش عارفة آخد نفسي.. مرة قلقانة.. مرات حيرانة.. مرات بفكر في حاجة المفروض أعملها "نفس الحاجة في كل المرات".. مرات بفكر في حاجة منتظرة إنها تتعمل "نفس الحاجة برضه".. بس في كل المرات كان السبب هو هو.. ويا ترى هو ده نفس سبب الخطوة الفرحانة؟؟.. مش عارفة
.
.
الرصيف ماله منقط كده ليه؟؟.. نزلت نقطة مطر ساقعة صغنونة على إيدي.. فرحت بيها قوي وحاولت أمسكها.. بس ما عرفتش
.
.
ساعة العصاري
ساعات الدنيا بتقفل في وشنا بشكل غريب.. لما الدور بييجي عليه (ما هو قفلة بيبان الدنيا في وش الواحد دي كاس بيلف علينا واحد واحد.. ولازمن ولابد كلنا ندوق منه.. آه أمال إيه).. ما بييجيش في بالي غير إني أكلمها.. من بين كل البيبان المقفلة بابها بيفضل مفتوح قدامي.. أنا عارفة في أبواب كتير هتفتح لي لو خبطت.. بس أنا مش بشوف غير بابها.. بس للأسف كل مرة بيبأة الباب مقفول.. قصدي الموبايل ما
بيردش.. ويا فرحتي بصوت جنات:"أحب أخرج مني وآجي لك وأسيب إحساسي يغني لك".. حضرتها نايمة ومش بترد
.
.
المغربية
هي: تروحي على طول عشان الدنيا شكلها هتمطر
أنا: هتمطر؟؟
هي: شكلها كده
أنا: طب يا ريت.. ده أنا نفسي أمشي في المطر.. زي زمان
هي:تضحك بصوت دافي
.
.
عندما يأتي المساء
ماشية في عباس العقاد.. الدنيا بتمطر.. بجد
.
.
أمنية قبل النوم
يا ريت كل الحاجات إلي بنتمناها تتحقق "بسرعة" كده
:)
6 comments:
ابقي وشوشيني من اللي حاطة اغنية جنات عشان احييها علي ذوقها واختيارها لجملتي المفضلة
:)
crossing fingers...for the last wish :)
بجد في حاجة غريبة تقريبا أنا برده كل ما الدنيا بتقفل برده مش بلاقي غيرها وأول باب لازم اعدى عليه وعلى فكرة برده علقت على أغنية جنات هههههه أكيد هى نفس الشخص صح أكيد مش صدفة
Epitaph,
:)
حاضر هقولك
The "last wish" is evolving into fulfillment, I think.
:)
Alsunian4ever,
ما تحتاريش يا مي
أكيد هي
مش عشان الأغنية
عشان هي أول واحدة بنفكر نخبط على بابها في الأوقات إياها
:)
عرفتها
:P
السلام عليكم
شكل فى حاجات كتير فاتتنى
هوا انا كنت فين....؟
على اى حال انا عرفت برضو مين المقصود
الاجابه (تونس)
ههههههههههه
احمدى ربنا انها مش قالتلك تعالى ناكل ايس كريم فى عز البرد والمطره..على فكره ممكن تعملها والله :)..أنا عارف
ربنا يخليكم لبعض
ويارب دايما مبسوطين
Beautiful Mind,
I told you would be kidnapped:)
هي مين دي؟
أنا إلي بقول دايمًا ناكل آيس كريم في البرد والمطرة:))
Post a Comment